La “Tarantella” di Cristoforo Caresana 
, di fine Seicento. Il testo, Quanno nascette Ninno a Bettalemme… , è attribuito a S. Alfonso de’ Liguori .
Video
Testo
Quanno nascette Ninno a Bettalemme
era notte e pareva miezo iuorno.
Maie le stelle – lustre e belle
se vedetteno accossí:
e a cchiù lucente
iett’a chiammà li Magge all’Oriente.
De pressa se scetaieno l’aucielle
cantanno de na forma tutta nova:
Pe ‘nsí a grille – co li strille,
e zombanno a ccà e a llà,
“È nato, è nato”,
decevano, “lo Dio che nci ha criato”.
Co tutto ch’era vierno, Ninno bello,
nascetteno a migliara rose e sciure.
Pe ‘nsí o ffieno sicco e tuosto
che fuie puosto – sott’a Te,
se ‘nfigliulette
e de frunnelle e sciure se vestette.
A no paese che se chiamma Ngadde,
sciurettero le bigne e ascette l’uva.
Ninno mio sapuritiello,
rappusciello – d’uva sì Tu;
ca tutt’amore
faie doce a vocca, e po ‘mbriache o core.
No ‘nc’erano nnemmice pe la terra,
la pecora pasceva co lione;
co’ o caprette – se vedette
O liupardo pazzeà;
L’urzo e o vitiello
E co’ lo lupo ‘npace o pecoriello.
Se rrevotaje ‘nzomma tutt’o munno,
lu cielo, a terra, o mare, e tutt’i gente.
Chi dormeva – se senteva
‘npiett’o core pazzeà
pe la priezza;
e se sonnava pace e contentezza.
Guardavano le ppecore i pasturi,
E n’Angelo sbrannente cchiù d’o sole
comparette – e le dicette:
“No ve spaventate, no;
contento e riso,
la terra è arreventata Paraviso.
A buie è nato ogge a Bettalemme
du Munno l’aspettato Sarvatore.
Dint’i panni o trovarrite
(nu potite – maie sgarrà)
Arravugliato,
e dinto a lo Presebbio curcato”.
A meliune l’Angiule calate
co chiste se mettetten’a cantare:
“Gloria a Dio, pace ‘nterra,
nu cchiù guerra – è nato già
Lo Rre d’amore,
Che dà priezza e pace a ogni core”.
Sbatteva o core ‘mpietto a ssi pasture;
E l’uno ‘nfaccia all’auto diceva:
“Che tardammo? – Priesto, iammo,
ca mme sento scevolí
pe lo golìo
che tengo de vedè sso Ninno Dio”.
Zombanno comm’a ciereve ferute,
Correttero i pasture a la capanna;
là trovajeno Maria
Co Giuseppe e a gioia mia;
e ‘n chillo Viso
provaieno no muorzo ‘e Paraviso.
Restaieno ‘ncantate e boccapierte
pe tanto tiempo senza dì parola;
po iettanno – lacremanno
nu suspiro pe sfocà,
da dint’o core
cacciaieno a migliara atte d’amore.
Co a scusa de donare li presiente
Se ietteno azzeccanno chiano chiano.
Ninno no li refiutaje,
l’azzettaje – comm’a ddí,
ca lle mettette
le mmane ‘n capo e li benedicette.
Piglianno confedenzia a poco a poco,
cercaieno licenzia a la Mamma:
se mangiaieno li pedille
coi vasille – ‘mprimmo, e po’
chelle manelle,
all’urtemo lo musso e i mascarielle.
Po’ assieme se mettetteno a sonare
e a cantà cu l’Angiule e Maria,
co na voce – ccossí doce,
Che Gesù facette: “Ah, ah”
e po chiudette
chill’uocchie aggraziate e s’addormette.
La nonna che cantaieno mme pare
Ch’avette a esse chesta che mo’ dico.
Ma ‘nfrattanto – o la canto,
mmacenateve de sta
co li Pasture
vecino a Ninno bello vuie pure.
“Viene suonno da lo Cielo,
viene e adduorme sso Nennillo;
pe pietà, ca è peccerillo,
viene suonno e non tardà.
Gioia bella de sto core,
vorria suonno arreventare,
doce doce pe te fare
ss’uocchie bell’addormentà.
Ma si Tu p’esser’amato
te sì fatto Bammeniello,
sulo amore è o sonnariello
che dormire te pò ffa.
Ment’è chesto può fa nonna,
pe Te st’arma è arza e bona.
T’amo, t’a… Uh, sta canzona
Già t’ha fatto addobeà!
T’amo Dio – bello mio,
t’amo, gioja, t’amo, t’a…”
Cantanno po’ e sonanno li pasture
Tornaieno a le mantre n’ata vota;
ma che buò, ca cchiù arrecietto
non trovaieno int’a lu pietto:
a o caro Bene
facevan’ ogni poco o va e biene.
Lo ‘Nfierno sulamente e i peccature
‘ncocciuse comm’a isso e ostinate
se mettetteno appaura,
pecché a scura – vonno sta
li spurtegliune,
fuienno da lo sole li briccune.
Io pure songo niro peccatore,
ma non boglio esse cuoccio e ostinato.
Io non boglio cchiù peccare,
voglio amare – voglio sta
co Ninno bello
comme nce sta lo voie e l’aseniello.
Nennillo mio, Tu sì sole d’amore,
faie luce e scarfe pure o peccatore
quanno è tutto – niro e brutto
comm’a pece, tanno cchiù
lo tiene mente,
e o faje arreventà bello e sbrannente.
Ma Tu mme diciarraie ca chiagniste,
acciò chiagnesse pure o peccatore.
aggi’o tuorto – ahie, fosse muorto
n’ora primmo de peccà!
Tu m’haie amato,
e io pe paga t’aggio maltrattato!
A buie, uocchie mieie, doie fontane
Avrite a fa de lagreme chiagnenno
pe llavare – pe’ scarfare
li pedilli di Giesù;
chi sa, pracato
deciesse: “Via, ca t’aggio perdonato”.
Viato me si agqio sta fortuna!
Che maie pozzo cchiù desiderare?
O Maria – speranza mia,
ment’io chiango, prega Tu:
penza ca pure
sì fatta Mamma de li peccature.
